Zbulimi Arkeologjik në Lin – Nga thellësitë e historisë drejt një qëndre Turistike dhe Shkencore

Një zbulim me rëndësi historike dhe shkencore po vjen në dritë në fshatin Lin, në bashkinë Pogradec. Bëhet fjalë për vendbanimin palafit të Linit, tashmë i konfirmuar nga Universiteti i Bernës si një nga vendbanimet më të hershme në Europë, me një moshë që tejkalon 8 mijë vjet.

Në kuadër të punimeve arkeologjike që po zhvillohen në këtë sit të jashtëzakonshëm, Kryetari i Bashkisë Pogradec, z. Ilir Xhakolli, zhvilloi një takim të rëndësishëm me profesor Adrian Anastasin dhe arkeologun zvicerian Albert Hafner, të cilët drejtojnë ekspeditën kërkimore.

Gjatë takimit u diskutua mbi progresin e deritanishëm të gërmimeve, gjetjet më të fundit dhe mundësitë konkrete për ta kthyer këtë trashëgimi në një pikë referimi për turizmin kulturor dhe kërkimin shkencor.

Synimi i bashkisë është që ky vendbanim i lashtë të mos mbetet vetëm një zbulim akademik, por të transformohet në një qendër të hapur për vizitorët dhe studiuesit, duke ofruar një përvojë unike në zemër të historisë së qytetërimit evropian.

Për këtë qëllim, shumë shpejt do të ngrihet edhe një qendër informacioni pranë sitit arkeologjik, e cila do të shërbejë si pikë orientuese për turistët vendas dhe të huaj. Vizitorët do të kenë mundësi të njihen nga afër me gjetjet e ekspeditës, teknikat e jetesës së banorëve të hershëm dhe vlerat unike që ky vendbanim përfaqëson për trashëgiminë tonë kulturore.

Ky projekt pritet të jetë një hap i madh për promovimin e turizmit arkeologjik dhe një mundësi për zhvillim të qëndrueshëm në zonën e Pogradecit.