Zhvarrosje për zbardhjen e së vërtetës: Gjykata e Larisës pranon kërkesën e babait të Denis Ruçit

Prokuroria dhe Gjykata e Shkallës së Parë të Larisës kanë pranuar kërkesën për zhvarrosjen e Denis Ruçit, djalit të shqiptarit Pano Ruçi (i njohur në Greqi si Panos Routsis), i cili humbi jetën në aksidentin hekurudhor tragjik në Tempi në vitin 2023.

Vendimi u mor pas një kërkese të paraqitur nga vetë i ati, Pano Ruçi, i cili prej 15 shtatorit ndodhet në grevë urie para Parlamentit grek, duke kërkuar zbardhjen e së vërtetës për vdekjen e të birit. Ai ka deklaruar publikisht se dyshon që trupi i varrosur nuk është ai i djalit të tij dhe ka kërkuar analiza të reja për të vërtetuar identitetin dhe për të zbuluar shkaqet reale të vdekjes.

Me urdhër të prokurores Aikaterini Papaioannou, Departamentit të Policisë së Larisës iu kërkua të realizonte një ekzaminim paraprak, i cili përfshin procedurën e zhvarrosjes dhe kryerjen e analizave të ADN-së. Hetimi gjithashtu parashikon edhe analizat toksikologjike që pritet të ndihmojnë në sqarimin e rrethanave të vdekjes së 22-vjeçarit.

Paralelisht, në Gjykatën e Apelit të Larisës u dorëzua një memorandum plotësues i nënshkruar nga dhjetëra të afërm të viktimave të aksidentit të Tempit. Ky dokument përmbante kërkesa të qarta për zhvarrosjen e trupit të Denis Ruçit dhe rëndimin e akuzave ndaj drejtuesve të kompanisë “Hellenic Train”.

Rasti ka marrë vëmendje të gjerë publike në Greqi dhe Shqipëri, pasi Pano Ruçi ka qenë një nga zërat më aktivë për hetimin e plotë të tragjedisë së Tempit, ku humbën jetën 57 persona dhe dhjetëra të tjerë u plagosën. Ai ka deklaruar se nuk do të ndalë përpjekjet deri në zbardhjen e plotë të ngjarjes dhe identifikimin e përgjegjësve.

“KORÇA BOOM”