Zhvillime në politikë, largime të bujshme dhe presion i shtuar

Pas humbjes në referendumin për reformën në drejtësi, qeveria e kryeministres Giorgia Meloni po përballet me një valë dorëheqjesh dhe presion në rritje nga politika.

Efekti i parë konkret ishte largimi i Andrea Delmastro Delle Vedove nga posti i Nënsekretarit të Drejtësisë. Ai njoftoi dorëheqjen e parevokueshme, duke marrë përgjegjësi për veprimet e tij, edhe pse theksoi se nuk kishte kryer asnjë shkelje ligjore. Po ashtu, dha dorëheqjen edhe Giusi Bartolozzi, shefe e kabinetit të Ministrit të Drejtësisë, pas polemikave për deklaratat e saj ndaj magjistratëve.

Zhvillimet vijnë pas një sërë takimesh të zhvilluara nga Meloni me drejtues të Fratelli d’Italia gjatë gjithë mëngjesit, me synimin për të dhënë një përgjigje të fortë politike pas rezultatit të referendumit.

Ndërkohë, në qendër të vëmendjes mbetet edhe Ministrja e Turizmit Daniela Santanchè, e cila është nën presion për hetime që lidhen me aktivitetet e kompanisë së saj dhe menaxhimin gjatë pandemisë. Sipas burimeve politike të Corriere della Sera, po diskutohen mundësitë për largimin e saj, megjithëse ende nuk është marrë një vendim përfundimtar.

Dorëheqja e Delmastro-s lidhet edhe me polemikat për përfshirjen e tij në një aktivitet biznesi të lidhur me persona të afërt me individë të dënuar për lidhje me Camorra. Nga ana tjetër, Bartolozzi ishte kritikuar për deklarata të forta publike kundër sistemit gjyqësor.

Opozita reagoi menjëherë ndaj këtyre zhvillimeve. Debora Serracchiani nga Partia Demokratike i cilësoi dorëheqjet si të vonuara dhe të diktuara nga rezultati i referendumit, duke akuzuar qeverinë për mungesë transparence dhe respekti ndaj institucioneve.

“KORÇA BOOM”