Zjarr masiv pranë autostradës, tymi i dendur vështirëson qarkullimin

Një zjarr me përmasa të mëdha ka përfshirë pasditen e së dielës zonën e Koxhasit në Shijak, ku flakët janë përhapur me shpejtësi të madhe, të favorizuara nga era e fortë.

Shtëllunga të dendura tymi kanë mbuluar një sipërfaqe të gjerë dhe janë bërë të dukshme edhe përgjatë autostradës Tiranë-Durrës, duke vështirësuar qarkullimin e automjeteve dhe duke ulur ndjeshëm shikueshmërinë për drejtuesit e mjeteve.

Në vendngjarje kanë mbërritur forcat zjarrfikëse të Shijakut, të cilat po punojnë për izolimin dhe shuarjen e flakëve, me qëllim parandalimin e përhapjes së tyre në zona të tjera.

Sipas të dhënave paraprake, zjarri dyshohet se ka nisur nga djegia e mbeturinave, por për shkak të erës së fortë flakët dolën shpejt jashtë kontrollit dhe përfshinë sipërfaqe të konsiderueshme.

Autoritetet vijojnë ndërhyrjen për neutralizimin e plotë të vatrës së zjarrit, ndërsa po hetojnë edhe shkaqet që çuan në shpërthimin e tij.

“KORÇA BOOM”