Zjarret izolojnë banorët: Gra dhe fëmijë kërkojnë ndihmë mes tymit dhe panikut"

Zjarret masive që kanë përfshirë disa zona malore të rrethit të Gramshit kanë marrë përmasa dramatike, duke kthyer situatën në një emergjencë të vërtetë civile. Prej ditësh, flakët janë përhapur me shpejtësi në territorin e njësisë administrative Skënderbegas, ku fshatrat Kullollas dhe Bletëz janë ndër më të prekurit.

Sipas raportimeve të fundit nga terreni, flakët kanë filluar të përfshijnë banesat në këto fshatra, duke krijuar një situatë tejet alarmante për banorët. Tymi i dendur dhe terreni i vështirë kanë bërë pothuajse të pamundur ndërhyrjen nga toka, duke penguar qasjen e ambulancave, zjarrfikësve dhe forcave të emergjencës. Si pasojë, shumë banorë janë bllokuar brenda zonës së rrezikuar, ndërkohë që disa kanë refuzuar të lënë shtëpitë e tyre, duke vënë në rrezik jetën.

Gra dhe fëmijë janë parë në gjendje paniku, ndërsa thirrjet për evakuim të menjëhershëm nga autoritetet nuk janë zbatuar nga të gjithë. Forcat vendore të emergjencës kanë nisur një operacion evakuimi të plotë për njësinë administrative Skënderbegas, në përpjekje për të shmangur humbje në njerëz.

Për të përballuar krizën, në zonë janë dislokuar trupa të Forcave të Armatosura, të cilat po asistojnë në evakuim dhe në përpjekjet për të izoluar vatrat e zjarrit. Paralelisht, janë angazhuar edhe helikopterë zjarrfikës për ndërhyrje nga ajri, pasi ndërhyrja tokësore është shumë e kufizuar.

Ministri i Brendshëm dhe Drejtori i Përgjithshëm i Emergjencave Civile janë nisur drejt zonës për të ndjekur nga afër operacionin dhe për të koordinuar veprimet mes strukturave të ndryshme shtetërore. Autoritetet kanë apeluar për bashkëpunim të plotë nga ana e qytetarëve, duke u kërkuar atyre që të dëgjojnë urdhrat për evakuim dhe të mos rrezikojnë jetën duke qëndruar në zonat e prekura.

Ndërkohë, ka pasur raportime për një grua me dy fëmijë të bllokuar në një fermë pranë zonës së zjarrit, e cila ka kërkuar ndihmë urgjente përmes rrjeteve sociale. Nuk ka ende konfirmim zyrtar për humbje jete, por dyshohet për një viktimë, çka pritet të verifikohet pas përfundimit të operacionit dhe shuarjes së plotë të flakëve.

Pas kontrollit të situatës, do të bëhet një vlerësim i detajuar i dëmeve materiale, të cilat sipas burimeve paraprake janë të konsiderueshme, për shkak të djegies së banesave, pemëtoreve dhe sipërfaqeve të gjera me bimësi.

“KORÇA BOOM”