Zyrtare nga SPAK: 9 raste për tenderat dhe akuza të tjera ndaj Belinda Ballukut

Prokuroria e Posaçme kundër Korrupsionit dhe Krimit të Organizuar ka dalë me një njoftim zyrtar për ish-zëvendëskryeministren dhe ish-ministren e Infrastrukturës, Belinda Balluku.

Sipas SPAK, më 20 tetor 2026, Ballukut i janë komunikuar akuzat përfundimtare për disa vepra penale, mes tyre shkelja e barazisë së pjesëmarrësve në tendera publikë, korrupsioni pasiv dhe mosdeklarimi i pasurisë.

Në njoftimin zyrtar bëhet e ditur se ndaj saj rëndojnë akuzat për “Shkelje e barazisë së pjesëmarrësve në tendera apo ankande publike”, në bashkëpunim, në nëntë raste, si dhe për “Korrupsion pasiv të personave që ushtrojnë funksione publike” dhe “Korrupsion pasiv të funksionarëve të lartë shtetërorë ose të të zgjedhurve vendorë”.

Gjithashtu, SPAK njofton se Balluku akuzohet për refuzim, mosdeklarim, fshehje ose deklarim të rremë të pasurive dhe interesave privatë, në dy raste.

Komunikimi i akuzave përfundimtare shënon një fazë të rëndësishme të procedimit penal ndaj ish-zyrtares së lartë. Akuzat janë pretendime të organit të akuzës dhe nuk përbëjnë në vetvete një vendim fajësie; kjo përcaktohet nga gjykata në përfundim të procesit gjyqësor.

“KORÇA BOOM”