13-vjeçarja përfundon në spital pas konsumimit të alkoolit

Një vajzë 13-vjeçare në qytetin Peristeri të Greqisë është dërguar në Spitalin e Fëmijëve “Agia Sophia”, pasi dyshohet se ka humbur ndjenjat si pasojë e konsumimit të alkoolit. Sipas mediave greke, autoritetet kanë arrestuar babain e të miturës, si edhe një punonjëse të kioskës që dyshohet se i shiti shishen e pijeve alkoolike.

Ngjarja ka ndodhur pak pas mesnatës së së martës, kur vajza ka blerë në mënyrë të paligjshme alkool nga një kioskë në zonën e Peristerit. Pas konsumimit të pijes, e mitura ka humbur ndjenjat, duke bërë të nevojshëm transportimin e saj me ambulancë drejt spitalit për ndihmën e parë mjekësore.

Sipas informacioneve paraprake, 13-vjeçarja ndodhej në shoqërinë e vajzave të tjera në momentin kur i ra të fikët. Gjendja e saj shëndetësore raportohet e stabilizuar, ndërsa mjekët po e mbajnë nën vëzhgim.

Autoritetet greke kanë nisur hetimet për zbardhjen e plotë të rrethanave të incidentit. Si punonjësja e kioskës ku dyshohet se u shit alkooli, ashtu edhe babai i vajzës, janë arrestuar dhe akuzohen për neglizhencë ndaj një të mituri.

Rasti ka ngjallur reagime në opinionin publik në Greqi, duke rikthyer në vëmendje problematikën e shitjes së alkoolit të miturve dhe përgjegjësinë e prindërve dhe bizneseve për mbrojtjen e fëmijëve.

"KORCA BOOM"