Astrologia që bëri milionerë, historia e pazakontë e Kazuko Hosokit!

Kazuko Hosoki ka qenë një nga fallxhoret më të ndjekura në historinë e Japonisë. Për më shumë se njëzet vjet, ajo u konsiderua një figurë me ndikim të madh publik, duke u kthyer në një fenomen social në fillim të viteve 2000. Libri i saj mbi horoskopin, i bazuar në sistemin e saj të quajtur “Rokusei Senjutsu” (astrologjia e Gjashtë Yjeve), shiti rreth 50 milionë kopje në vitin 1982 dhe hyri në Librin Guinness si libri më i shitur i astrologjisë në botë.

Hosoki lindi në Tokio në vitin 1938 dhe u rrit në kushte të vështira ekonomike pas Luftës së Dytë Botërore. Ajo ka treguar se në fëmijëri kërkonte ushqim në zonat e shkatërruara, një përvojë që ndikoi në ambicien e saj për të arritur sukses. Në moshë të re, ajo u përfshi në jetën e natës në zonën Ginza të Tokios, ku drejtoi disa klube dhe fitoi nofkën “Mbretëresha e Ginzas”. Këto ambiente frekuentoheshin nga figura të rëndësishme, përfshirë politikanë dhe përfaqësues të botës së biznesit.

Sipas disa burimeve, ngritja e saj u shoqërua edhe me praktika të dyshimta financiare dhe lidhje me krimin e organizuar. Pas një humbjeje të madhe financiare, ajo ndryshoi drejtim në karrierë. Në vitin 1983 u martua me brokerin japonez Masahiro Yasuoka, i cili vdiq pak muaj më vonë duke i lënë një pasuri të konsiderueshme.

Me këto mjete financiare, Hosoki u përqendrua në astrologji dhe krijoi sistemin e saj të parashikimit të fatit. Ndryshe nga modelet tradicionale kineze, që bazohen në katër elementë të lindjes (dita, muaji, viti dhe ora), sistemi i saj përdorte gjashtë “yje” dhe mbështetej kryesisht në vitin e lindjes. Ajo formuloi cikle të fatit, duke përfshirë “vite të arta”, “vite pritjeje” dhe “vite të vështira”, të cilat sipas saj shoqëroheshin me rreziqe dhe dështime.

Hosoki u dallua për stilin e saj të drejtpërdrejtë dhe shpesh të ashpër në komunikim. Në emisionet televizive ajo jepte këshilla të prerë për jetën personale dhe profesionale të të ftuarve, duke përdorur shpesh gjuhë kritike. Kjo mënyrë komunikimi u bë pjesë e imazhit të saj publik dhe ndikoi në rritjen e audiencës, por gjithashtu shkaktoi polemika.

Gjatë viteve 2000, ajo drejtoi programe të suksesshme televizive dhe botoi dhjetëra libra, shumica prej të cilëve u kthyen në bestseller në Japoni. Paralelisht, ajo shprehu qëndrime konservatore për rolin e grave në shoqëri dhe mbështeti disa qëndrime politike të diskutueshme.

Megjithatë, karriera e saj u shoqërua me akuza të shumta për mashtrime shpirtërore. Disa ish-ndjekës pretenduan se ajo shfrytëzonte frikën e njerëzve për të shitur objekte si amulete dhe produkte të tjera me çmime të larta. Të tjerë e kritikuan për ndikim të tepruar në vendimmarrjen personale të individëve.

Nga viti 2008, Hosoki filloi të tërhiqej gradualisht nga jeta publike, duke ia lënë aktivitetin vajzës së saj, Kaori Hosoki. Megjithatë, kjo e fundit nuk arriti të përsërisë të njëjtin nivel suksesi.

Kazuko Hosoki vdiq në vitin 2021 në moshën 83-vjeçare si pasojë e një insuficience respiratore. Pavarësisht polemikave, ajo mbetet një figurë e njohur e kulturës pop japoneze, e lidhur me ndërthurjen e supersticionit, medias dhe ndikimit personal në publik./ Pamfleti

“KORÇA BOOM”