Automjeti del nga rruga dhe godet një lokal, lëndohen katër persona

Një aksident ka ndodhur në aksin rrugor Mollas–Gostimë, ku një automjet ka humbur kontrollin, ka dalë nga rruga dhe është përplasur me pjesën e jashtme të një lokali.

Si pasojë e përplasjes janë lënduar dy klientë që ndodheshin pranë lokalit, si dhe dy persona të tjerë që udhëtonin me automjetin. Të lënduarit janë transportuar menjëherë drejt spitalit për të marrë ndihmën e nevojshme mjekësore.

Fatmirësisht, të dhënat paraprake tregojnë se asnjëri prej tyre nuk ndodhet në rrezik për jetën.

Policia ndodhet në vendngjarje dhe ka nisur hetimet për të zbardhur shkaqet e aksidentit. Dyshohet se humbja e kontrollit mund të jetë shkaktuar nga lagështia në asfalt, por nuk përjashtohen edhe pista të tjera.

"KORCA BOOM"