Bastiset Komisioni Evropian për marrëveshjen 900 mln euro

Ambientet e Komisionit Evropian në Bruksel janë bastisur nga policia belge në kuadër të një hetimi që lidhet me shitjen e aseteve të pasurive të paluajtshme ndaj shtetit belg gjatë vitit 2024.

Një zëdhënës i ekzekutivit të Bashkimit Evropian konfirmoi se institucioni është në dijeni të hetimit në vazhdim, i cili ka të bëjë me shitjen e 23 ndërtesave në pronësi të Komisionit. Marrëveshja, me një vlerë prej rreth 900 milionë eurosh, u realizua në një kohë kur Komisioni kishte vendosur të reduktonte hapësirën e zyrave me rreth një të katërtën, për shkak të rritjes së punës nga shtëpia pas pandemisë së Covid-19.

Sipas një burimi pranë hetimit, kontrollet janë kryer në orët e para të mëngjesit të së enjtes, duke konfirmuar raportimet e mëparshme të mediave ndërkombëtare.

Zyra e Prokurorit Publik Evropian (EPPO) bëri të ditur se po zhvillon aktivitete për mbledhjen e provave në kuadër të një hetimi që përfshin Komisionin Evropian.

Nga ana e tij, Komisioni theksoi se është i përkushtuar ndaj transparencës dhe llogaridhënies, duke shtuar se do të bashkëpunojë plotësisht me EPPO-n dhe autoritetet kompetente belge për zbardhjen e plotë të çështjes.

"KORCA BOOM"