Belinda Balluku thirret në SPAK, zëvendëskryeministrja nën hetim për tendera

Belinda Balluku nën hetim nga SPAK, pritet të paraqitet më 27 tetor

Zëvendëskryeministrja dhe Ministrja e Infrastrukturës dhe Energjisë, Belinda Balluku, është marrë nën hetim nga Prokuroria e Posaçme Kundër Korrupsionit dhe Krimit të Organizuar (SPAK).

Sipas burimeve të besueshme të News24, një fletëthirrje e firmosur nga prokurori Dritan Prençi i është dorëzuar ministres ditën e martë në ambientet e Ministrisë së Infrastrukturës dhe Energjisë. Në dokumentin zyrtar, Ballukut i kërkohet të paraqitet në Prokurorinë e Posaçme më 27 tetor 2025, e shoqëruar nga një avokat – detaj që nënkupton se ndaj saj mund të komunikohet një akuzë penale.

Ky zhvillim pritet të pasohet nga ndjekje penale pa kërkesë për masë sigurie, çka do të thotë se SPAK nuk ka nevojë të kërkojë autorizim në Kuvend, për shkak të imunitetit të saj si deputete.

Para publikimit të këtij lajmi, Gazment Bardhi kishte paralajmëruar se disa dosje që lidhen me veprimtarinë e ministres “po hynin në fazat përfundimtare”. Ai e quajti Ballukun “zyrtaren më të korruptuar në 35 vite”, duke përmendur projektet e Tunelit të Llogarasë, Aeroportit të Vlorës, si dhe kontratat në sektorin e energjisë.

Ndërkohë, SPAK reagoi zyrtarisht për News24 duke deklaruar shkurt se:“Prokuroria e Posaçme nuk ka asgjë për të ndarë me median.”

Kjo deklaratë vjen në mes të raportimeve se emri i Ballukut është regjistruar si person nën hetim për shkelje të barazisë në tendera, ndërsa vetë ministrja ende nuk ka bërë një reagim publik për çështjen.

"KORÇA BOOM"