Dinastia që mbajti Çeçeninë nën kontroll po lëkundet, analistët paralajmërojnë kaos

Mediat perëndimore po ngrenë alarmin se Çeçenia po hyn në një nga momentet më të rrezikshme të historisë së saj të pasluftës. Në qendër të vëmendjes është familja Kadyrov, e cila prej më shumë se dy dekadash ka sunduar republikën me dorë të hekurt dhe me mbështetjen e plotë të Kremlinit. Sot, kjo strukturë pushteti duket më e brishtë se kurrë.

Shqetësimet janë shtuar ndjeshëm pas raportimeve për gjendjen e rëndë shëndetësore të Ramzan Kadyrovit. Lideri çeçen, 50 vjeç, thuhet se prej kohësh vuan nga probleme serioze shëndetësore, përfshirë komplikacione të rënda në veshka, pankreas dhe mushkëri.

Mungesa e tij në një takim të rëndësishëm me presidentin rus Vladimir Putin, rreth dy javë më parë, nxiti spekulime të forta për përkeqësimin e gjendjes së tij. Zyrtarisht, autoritetet ruse i kanë mohuar këto zëra, por heshtja e pazakontë e mediave pranë Kremlinit ka shtuar dyshimet.

Situata u tensionua edhe më tej pas lajmit për një aksident të rëndë automobilistik në Grozni, ku u përfshi Adami, 18 vjeç, djali i Ramzan Kadyrovit dhe figura që prej vitesh po përgatitej si trashëgimtar politik. Ai mbante poste kyçe në strukturat e sigurisë, përfshirë detyrën e Sekretarit të Këshillit të Sigurimit. Fillimisht u dërgua në një spital lokal, por për shkak të gjendjes kritike u transportua me urgjencë në Moskë.

Prej fillimit të viteve 2000, Kremlini ka mbajtur nën kontroll Çeçeninë përmes familjes Kadyrov. Fillimisht përmes Akhmat Kadyrovit, e më pas Ramzanit, i cili shtypi çdo formë opozite me metoda brutale dhe e shndërroi republikën në një nga aleatët më besnikë të Moskës. Megjithatë, analistët vërejnë se djemtë e tjerë të tij, ndonëse mbajnë poste zyrtare, nuk duken të aftë të garantojnë stabilitetin që Kremlini kërkon.

Sipas vëzhguesve perëndimorë, një shembje e papritur e dinastisë Kadyrov do ta kthente Çeçeninë sërish në një vatër të rrezikshme tensioni. Rajoni, i shënuar nga dy luftëra shkatërrimtare dhe konflikte të përgjakshme, rrezikon të rikthehet në kaos, me pasoja të paparashikueshme për gjithë Kaukazin.

Për Moskën, një krizë e tillë do të vinte në një moment jashtëzakonisht delikat, kur Rusia tashmë përballet me presione të shumta të brendshme dhe ndërkombëtare. Heshtja zyrtare dhe mungesa e transparencës vetëm sa ushqejnë skenarët e pasigurisë, duke e bërë të ardhmen e Çeçenisë më të paqartë se kurrë.

"KORCA BOOM"