E rëndë në Korçë/ 62-vjeçari përplaset nga makina dhe ndërron jetë në spital

Një aksident me pasojë vdekjen ka ndodhur paraditen e sotme në aksin rrugor Korçë–Bilisht, pranë kryqëzimit të fshatit Tren.

Sipas informacionit të Policisë, rreth orës 11:45, automjeti që drejtohej nga shtetasi F. P., 47 vjeç, banues në fshatin Sul të Devollit, ka përplasur shtetasin L. Sh., rreth 62 vjeç, i cili sapo kishte zbritur nga një automjet tjetër.

Për shkak të plagëve të marra, 62-vjeçari u transportua me urgjencë në Spitalin e Korçës, por nuk arriti t’u mbijetojë dëmtimeve dhe ndërroi jetë.

Pas ngjarjes, specialistët e Sektorit të Qarkullimit Rrugor arrestuan në flagrancë drejtuesin e automjetit, për veprën penale “Shkelja e rregullave të qarkullimit rrugor”, me pasojë vdekjen.

Ndërkohë, materialet procedurale i janë referuar Prokurorisë së Korçës për veprime të mëtejshme hetimore.

“KORÇA BOOM”