Emocione deri në fund: Skënderbeu përmbys Basanian në kohën shtesë

Skënderbeut i janë dashur minutat shtesë për të siguruar kualifikimin ndaj Basanias, në një ndeshje që fillimisht u mor lehtë nga kampi korçar, por që rezultoi shumë më e vështirë sesa pritej. Kundërshtari u tregua i organizuar dhe luftarak gjatë gjithë 90 minutave të kohës së rregullt.

Trajneri Gjoka vendosi të aktivizonte pothuajse të gjithë lojtarët e formacionit të dytë, duke nisur nga porta e deri në repartet e tjera. Megjithatë, korçarët hasën në një skuadër që ishte mjaft e mbyllur në mbrojtje dhe e rrezikshme në kundërsulm.

Skënderbeu kaloi në avantazh që në minutën e 8-të me golin e Ukucit, por gëzimi zgjati pak, pasi vetëm pesë minuta më vonë, Toma barazoi për Basanian. Në minutën e 86-të, korçarët rikthejnë epërsinë, por sërish reagimi i Basanias ishte i menjëhershëm, me Zefin që barazoi në të 88-ën, duke dërguar ndeshjen në shtesë.

Në kohën shtesë, Skënderbeu tregoi superioritetin e tij fizik dhe teknik. Gjatë 30 minutave shtesë, korçarët shënuan tri herë me anë të Nastos, Ramos dhe Tayos, duke vulosur kualifikimin dhe shuar çdo shpresë të miqve për një surprizë të madhe.

“KORÇA BOOM”