Futbolli bashkon të vegjlit në Korçë: Turneu 3 vs 3 dhe 4 vs 4 një sukses

Shoqata Rajonale e Futbollit Korçë, në bashkëpunim me Drejtorinë Teknike dhe me mbështetjen e FSHF-së, organizoi një mini turne futbolli për fëmijët e moshës 10–12 vjeç.

Aktiviteti u zhvillua pranë ambienteve të qendrës sportive për fëmijë në Korçë, ku u luajtën ndeshje në formate mini futbolli 3 vs 3 dhe 4 vs 4.

Në këtë nismë morën pjesë akademitë e rajonit, mes tyre Akademia Skënderbeu dhe Young Boys, të cilat u angazhuan me përkushtim maksimal. Trajnerët e të dyja akademive treguan edhe një herë se puna e tyre është e bazuar në seriozitet dhe pasion, duke formuar elementë të rinj dhe të talentuar për të ardhmen e futbollit.

Pjesëmarrja ishte shumë e mirë, me energji pozitive dhe atmosferë festive, ku fëmijët shijuan futbollin dhe prindërit mbështetën nga afër fëmijët e tyre. Kontributi i prindërve është thelbësor për edukimin dhe angazhimin e të vegjëlve në sport, si një shtyllë bazë për zhvillimin e tyre psiko–fizik.

Niveli i lojës ishte shumë i kënaqshëm dhe cilësor, dhe u evidentuan disa fëmijë që premtojnë shumë për të ardhmen. Këto aktivitete janë një mënyrë e shkëlqyer për të zbuluar dhe zhvilluar talente të reja në futbollin rajonal.

Shoqata Rajonale e Futbollit Korçë dhe drejtoria teknike njoftojnë se shumë shpejt do të organizojnë edhe një tjetër mini turne me formate 5 vs 5 dhe 6 vs 6, si dhe një aktivitet mes shkollave 9-vjeçare të qytetit, për djem dhe vajza.

“KORÇA BOOM”