Krim në hije: Si u vra një biznesmen i huaj në Shqipëri dhe pse dyshohet një 48-vjeçar nga Vlora?

Policia e Gjirokastrës ka shpallur në kërkim Kamber Sulçen, 48 vjeç, nga Vlora, si autorin e dyshuar të vrasjes së biznesmenit italian Edoardo Sarchi. Ngjarja e rëndë ndodhi në zonën e thellë të Salarisë, në Tepelenë, dhe dyshohet se u shkaktua pas një konflikti për motive të dobëta mes palëve të përfshira.

Sipas informacioneve të hetimit paraprak, Kamber Sulçe ka qëlluar me një armë me vjaska ndaj biznesmenit italian dhe shoqëruesve të tij. Si pasojë e të shtënave, Sarchi humbi jetën në vend, ndërsa të tjerë persona që ndodheshin me të kanë shpëtuar pa lëndime të rënda.

Nga vendngjarja janë sekuestruar automjetet e viktimës dhe të shoqëruesve të tij, si dhe dy armë gjahu. Policia, e mbështetur edhe nga forcat speciale, ka ndërmarrë kontrolle intensive në zonat malore përreth, ku gjatë kërkimeve u zbuluan elementë të tjerë që lidhen me autorin.

Në një zonë të thellë midis fshatrave Nivicë dhe Bolenë, janë gjetur të fshehura një automjet dhe rrobat që dyshohet se janë përdorur nga autori gjatë kryerjes së krimit. Po ashtu, brenda një çante të braktisur në shkurre, u sekuestruan dylbi me rreze infra, dylbi termike, një mbajtëse arme dhe një elektrik dore, të cilat dyshohet se i përkisnin autorit dhe mund të jenë përdorur për ndjekje apo përgatitje të sulmit.

Policia ka ngritur pika kontrolli në disa zona hyrëse dhe dalëse të qarkut dhe ka intensifikuar hetimet për kapjen sa më parë të Kamber Sulçes, i cili ndodhet ende në arrati.

“KORÇA BOOM”