Mosha e pensionit drejt 70 vjeç? Debati që po trondit

Gjermania ka hapur një debat të fortë publik lidhur me rritjen e moshës së daljes në pension, një çështje që po ndan opinionin mes punëtorëve dhe ekonomistëve. Ndërsa shumë punonjës e kundërshtojnë kategorikisht një zgjatje të viteve të punës, ekspertët argumentojnë se kjo mund të jetë e vetmja rrugëdalje përballë rënies së lindshmërisë dhe rritjes së vazhdueshme të jetëgjatësisë. Një realitet që nuk prek vetëm Gjermaninë, por edhe vende të tjera evropiane, përfshirë Greqia.

Në përpjekje për ta bërë sistemin e pensioneve të qëndrueshëm në planin afatgjatë, Komiteti i Pensioneve i qeverisë gjermane pritet të shqyrtojë më 23 shkurt mundësinë e rritjes së moshës së daljes në pension deri në 70 vjeç, sipas raportimeve të gazetës Bild. Ky propozim ka ndezur reagime të shumta, pasi do të përbënte një ndryshim të madh në politikat sociale të vendit.

Ekonomisti Holger Schaefer, nga Instituti Ekonomik Gjerman (IW), shprehet se diskutimi për pensionin në moshën 70-vjeçare mund të ketë ardhur madje me vonesë. Sipas tij, boshllëku i krijuar nga dalja në pension e brezit të ashtuquajtur “Baby Boomer” nuk po mbushet nga brezat pasardhës, për shkak të numrit më të ulët të lindjeve dhe mungesës së fuqisë punëtore.

“Ky proces është tashmë në zhvillim dhe do të arrijë kulmin rreth vitit 2030. Rritja e moshës së pensionit si zgjidhje për problemin e ‘Boomer’ mund të vijë vonë, por kjo nuk do të thotë se nuk duhet ndërmarrë”, është shprehur Schaefer për rrjetin ntv.de.

Ai kujton gjithashtu se procesi i mëparshëm i rritjes së moshës së pensionit nga 65 në 67 vjeç zgjati më shumë se 20 vjet, çka tregon se çdo ndryshim i tillë kërkon kohë, konsensus politik dhe përgatitje të kujdesshme. Debati pritet të intensifikohet në muajt në vijim, ndërsa qeveria përballet me sfidën e balancimit mes qëndrueshmërisë financiare dhe pritshmërive sociale të qytetarëve.

"KORCA BOOM"