“Na iku gjithë mundi i jetës”/ Blegtorit në Çërravë i digjet e gjithë tufa

Një ngjarje e rëndë ka ndodhur në fshatin Çërravë të Pogradecit, ku një zjarr ka përfshirë një fermë dhe ka shkaktuar dëme të mëdha në bagëti. Sipas pronarit të fermës, flakët kanë përfshirë stallën në orët e para të mëngjesit dhe si pasojë janë djegur 170 krerë dele.

Ngjarja ka tronditur komunitetin lokal, ndërsa blektori i prekur, i cili e ka ndërtuar fermën me vite punë të ndershme, ka bërë thirrje për ndihmë nga autoritetet shtetërore.

“Kam humbur gjithçka. Nuk e përballoj dot vetëm këtë dëm. Kjo ishte mënyra jonë e jetesës, gjithë investimi i familjes sime. Duam ndihmë nga shteti,” u shpreh ai për mediat.

Shkaku i zjarrit nuk është bërë ende i ditur, por dyshohet për një defekt në sistemin elektrik të brendshëm. Fatmirësisht, nuk ka pasur të lënduar në njerëz, por dëmet materiale janë të mëdha dhe të pariparueshme pa mbështetje institucionale.

Banorë të zonës kanë apeluar gjithashtu për ndihmë, duke kërkuar që institucionet të reagojnë shpejt për të ndihmuar familjen që mbeti pa asnjë burim jetese.

"KORÇA BOOM"