Paga e mësuesve rritet me 3,000 lekë nga janari 2026

Nga 1 janari 2026, të gjithë punonjësit e administratës publike në Shqipëri do të përfitojnë një rritje të re pagash, në kuadër të politikës së re të indeksimit vjetor që po zbaton qeveria.

Kjo nismë synon të mbrojë fuqinë blerëse të punonjësve dhe të sigurojë një shpërndarje më të drejtë të të ardhurave në sektorin publik.

Sipas njoftimit zyrtar, mësuesit do të marrin një shtesë prej 3 mijë lekësh në muaj, ndërsa rritjet do të variojnë deri në 10 mijë lekë për kategori të tjera punonjësish, në varësi të funksionit dhe nivelit të përgjegjësisë.

Kryeministri Edi Rama deklaroi se kjo reformë është pjesë e një qasjeje të re për ndërtimin e një sistemi pagash “të drejtë, të balancuar dhe të lidhur ngushtë me realitetin ekonomik dhe koston e jetesës”.

Në bazë të vendimit, përfituesit kryesorë do të jenë:

• Punonjësit ndihmës të institucioneve publike (sanitare, shoferë, teknikë, magazinierë, arkivistë, protokollistë), të cilët do të marrin një shtesë prej 10 mijë lekësh;

  
  

• Specialistët e administratës, që do të përfitojnë 5 mijë lekë më shumë çdo muaj;

  
  

• Mësuesit, me një rritje prej 3 mijë lekësh.

  
  

Në të njëjtën kohë, për herë të parë do të përfshihet edhe vlerësimi i vjetërsisë në punë për punonjësit e sistemit shëndetësor, ndërsa pagat e mjekëve, infermierëve dhe efektivëve të Policisë së Shtetit do të rriten gradualisht sipas një skeme progresive.

Qeveria ka parashikuar të shtojë rreth 100 milionë euro në buxhetin e vitit 2026 për të mbuluar kostot e kësaj politike, e cila pritet të ndikojë drejtpërdrejt në rritjen e motivimit dhe efikasitetit të punonjësve publikë.

Reforma vjen pas disa rritjeve të njëpasnjëshme në sektorin e arsimit dhe të shëndetësisë gjatë viteve të fundit, me qëllim përmirësimin e cilësisë së shërbimeve publike dhe rritjen e dinjitetit të profesionit të mësuesit.

“KORÇA BOOM”