Qielli shpërthen” mbi SHBA, meteor gjigant trondit Massachusettsin

Një meteor i fuqishëm shpërtheu në atmosferë mbi brigjet e Massachusetts në SHBA, duke shkaktuar një zhurmë të fortë që u dëgjua në zona të gjera të verilindjes së vendit. Sipas NASA-s, energjia e çliruar nga shpërbërja e tij ishte e barabartë me shpërthimin e rreth 300 tonëve TNT.

Ngjarja u regjistrua rreth orës 14:00 me kohën lokale, kur dhjetëra qytetarë raportuan se panë një top të madh zjarri në qiell. Fenomeni u vërejt nga zona të ndryshme, përfshirë Bostonin, Ipswich-in dhe Long Island-in.

Të dhënat satelitore të Administratës Kombëtare Oqeanike dhe Atmosferike (NOAA) konfirmuan një sinjal të përputhshëm me hyrjen e një meteori në atmosferë në të njëjtën kohë kur u raportua shpërthimi. Sipas ekspertëve, objekti ka hyrë në atmosferë pranë bregdetit jugor të Bostonit.

NASA bëri të ditur se meteori u shpërbë në një lartësi prej rreth 64 kilometrash mbi Massachusettsin verilindor dhe New Hampshire-in juglindor. Fuqia e madhe e energjisë së çliruar shpjegon edhe gjëmimin e fortë që alarmoi banorët e zonës.

Ekspertët theksojnë se nëse fragmente të meteorit kanë rënë në oqean, gjasat për t’i gjetur ato janë shumë të vogla. Sipas specialistëve të Muzeut Kombëtar të Ajrit dhe Hapësirës Smithsonian, shumica e meteoritëve përfundojnë në ujë, pasi pjesa më e madhe e sipërfaqes së Tokës mbulohet nga oqeanet.

Ngjarja vjen pas disa incidenteve të ngjashme të regjistruara gjatë vitit 2026. Në muajin mars, meteorë të tjerë shpërthyen mbi Ohajo dhe Teksas, duke krijuar valë goditëse të fuqishme dhe duke shpërndarë fragmente në zona të banuara.

Shkencëtarët kanë vënë re një shtim të pazakontë të rasteve me topa zjarri dhe bume sonike gjatë muajve të parë të këtij viti, ndërsa NASA sqaroi se objekti që hyri në atmosferë ishte me origjinë natyrore dhe jo mbeturinë hapësinore apo pjesë sateliti.

“KORÇA BOOM”