Reagim i fortë nga Spitali i Durrësit: “Pretendimet për ndërprerje energjie nuk janë të vërteta”

Spitali i Durrësit ka reaguar lidhur me vdekjen e të miturit që humbi jetën pas plagosjes me thikë gjatë një konflikti. Në njoftimin e tij, spitali u shpreh ngushëllimet familjarëve dhe theksoi se pacienti mbërriti në gjendje jashtëzakonisht të rëndë shëndetësore.

Sipas deklaratës zyrtare, i mituri ishte në shok traumatik dhe hemorragjik në momentin e paraqitjes. Mjekët ndërhynë menjëherë me procedurat emergjente të specializuara dhe arritën të kryenin stabilizimin fillestar, por komplikacionet e gjendjes kritike çuan në arrest kardiak traumatik.

Reagimi i Spitalit të Durrësit erdhi pas disa pretendimeve të afërmve dhe raportimeve në media, të cilat aludonin se gjatë ndërhyrjes kirurgjikale në sallën e operacionit kishte pasur ndërprerje të energjisë elektrike. Spitali i cilësoi këto pretendime si të pavërteta.

Në sqarimin e tij thuhet se pas verifikimeve të kryera me ekipet e sallës së operacionit, anestezistët dhe stafin e reanimacionit, nuk është konstatuar asnjë ndërprerje energjie gjatë ndërhyrjes. Po ashtu, spitali shpjegoi se sistemi i gjeneratorit aktivizohet automatikisht dhe pajisjet jetike kanë bateri rezervë, që sigurojnë funksionim të pandërprerë edhe në rast të luhatjeve të mundshme.

Spitali bëri të ditur se edhe ashensorët janë funksionalë dhe të mbuluar me kontratë mirëmbajtjeje, duke përjashtuar mundësinë e ndonjë defekti që do të kishte ndikuar në trajtimin e pacientit.

Në fund, Spitali Rajonal i Durrësit deklaron se mbetet i angazhuar për garantimin e kujdesit shëndetësor dhe po bashkëpunon plotësisht me institucionet përkatëse për sqarimin e plotë të ngjarjes.

"KORCA BOOM"