Shqipëria i dha dashuri, ai i dha liri – Ambasadori që deshi Shqipërinë deri në fund, ndahet nga jeta në Tiranë

Werner Daum, ish-ambasadori i Gjermanisë në Shqipëri, ka ndërruar jetë në moshën 82-vjeçare, teksa ndodhej për një vizitë në vendin që e kishte gjithmonë në zemër. Ai u gjet i pajetë në dhomën e tij të hotelit, disa ditë pas pjesëmarrjes në ceremoninë përkujtimore të dëshmorit të demokracisë Josif Budo në Kavajë.

Diplomati gjerman kishte shërbyer në Tiranë gjatë viteve 1987–1990, në një nga periudhat më të vështira por historike për Shqipërinë. I njohur për qëndrimin e tij të guximshëm, Daum kishte hapur dyert e ambasadës gjermane për qindra qytetarë shqiptarë që kërkonin të arratiseshin nga regjimi komunist. Ky veprim ishte në kundërshtim me direktivat zyrtare të qeverisë së tij, por ai e ndërmori me bindjen se po vepronte në të mirë të njerëzve dhe të lirisë.

Në një intervistë vite më vonë, ai tregoi se kishte vepruar me vetëdije të plotë, duke besuar se një valë arratisjesh do të çonte në përshpejtimin e rënies së diktaturës. Ai e përshkroi atë kohë si momentin e lindjes së lirisë në Shqipëri, një ndryshim që sipas tij nuk erdhi nga jashtë, por nga vetë shqiptarët – veçanërisht të rinjtë dhe intelektualët.

Gjatë vizitës së tij të fundit në Kavajë, Daum u nderua me një çertifikatë mirënjohjeje nga kryetari i bashkisë, Fisnik Qosja, për kontributin e tij historik në vitin 1990. Ai kujtoi se kishte qenë në Shqipëri deri në korrik të atij viti, kur ambasada gjermane u mbyll dhe u shemb fizikisht, por la pas një simbol të fortë për shpresën dhe lirinë.

Daum foli gjithashtu me respekt për shkrimtarin Ismail Kadare, të cilin e cilësonte si një simbol të shpirtit të lirë, dhe kujtonte se edhe ai vetë ishte mbajtur nën vëzhgim nga autoritetet për takimet me të.

Pas largimit nga Shqipëria, ai vijoi të promovonte kulturën shqiptare në Gjermani dhe Austri. Në vitin 2001 organizoi një ekspozitë të madhe në Mynih dhe më vonë në Vjenë, e cila përfshinte artefakte tradicionale, ikona dhe skena nga jeta shqiptare. Ekspozita tërhoqi mbi 32 mijë vizitorë dhe shërbeu si një dritare drejt trashëgimisë kulturore të Shqipërisë.

Werner Daum u largua nga jeta në tokën që e quante të dytin atdhe, duke lënë pas një trashëgimi të rrallë humanizmi dhe guximi në shërbim të lirisë.

“KORÇA BOOM”