Si po ndryshon tregu i banesave në Korçë: çmime, qira dhe sfida të ndërtimit

Në krahasim me qytetet bregdetare si Vlora apo Saranda, çmimet e pronave në Korçë janë më të moderuara, por tendenca e rritjes është e dukshme. Për apartamente të reja të tipit 1+1, çmimet fillestare lëvizin rreth 800 euro për metër katror. Në zonat më të preferuara, veçanërisht në lagjet karakteristike ose për ndërtesa me vlera arkitektonike, çmimet mund të arrijnë deri në 1,200 deri në 1,500 euro për metër katror.

Edhe qiratë kanë pësuar rritje gjatë viteve të fundit. Për banesa të reja, qiratë mujore zakonisht fillojnë nga 300 euro, ndërsa për pronat më të vjetra, qiratë sillen rreth 200 euro në muaj. Kjo tregon një rritje të qëndrueshme të kërkesës për banim, sidomos nga banorët lokalë, të rinjtë që punojnë në qytet, si edhe emigrantë që kthehen për periudha të caktuara.

Një faktor që po ndikon dukshëm në rritjen e çmimeve është mungesa e ofertës së re ndërtimore. Në vitet e fundit, në Korçë nuk ka pasur zhvillime të mëdha ndërtimore, gjë që ka krijuar një disbalancë mes kërkesës dhe ofertës. Kjo ka bërë që çmimet e pronave ekzistuese të rriten, pasi alternativa të reja në treg janë të pakta.

Korça vazhdon të mbajë një profil të veçantë në tregun imobiliar shqiptar, si një qytet me histori, kulturë, dhe klimë të favorshme për banim të qëndrueshëm. Megjithëse nuk ka rritjet agresive të çmimeve si bregdeti apo Tirana, ajo mbetet një zonë me potencial të mirë për investime afatgjata, veçanërisht për ata që kërkojnë prona me vlerë historike ose turistike.

“KORÇA BOOM”