Veliaj reagon pas 6 muajsh në burg: “Asnjë shkelje në 12 vite detyrë – ky është persekutim politik!”

Nga qelia e paraburgimit në Durrës, kryebashkiaku i pezulluar i Tiranës, Erion Veliaj, ka reaguar për herë të parë në mënyrë të drejtpërdrejtë ndaj akuzave të ngritura ndaj tij nga SPAK. Në një deklaratë të gjatë dhe të artikuluar, Veliaj e cilëson të gjithë procesin hetimor si një përpjekje për “eliminim politik”, duke theksuar se nuk ekziston asnjë provë për shkelje ligjore gjatë mandatit të tij.

“Pas 12 vitesh në detyrë publike, asnjë shkelje nuk është konstatuar. Asnjë. Kjo është një ndjekje penale me prapavijë politike,” deklaron Veliaj, duke akuzuar strukturat e drejtësisë për përdorim selektiv të ligjit dhe shkelje flagrante të të drejtave procedurale.

Veliaj thotë se i është komunikuar zyrtarisht akuza nga pesë agjentë të BKH brenda qelisë, pak minuta pasi lajmi kishte dalë në media. “U thye çdo normë e mbrojtjes dhe e sekretit hetimor. Qëllimi ishte presioni publik, jo drejtësia,” shkruan ai. Më tej, pretendon se dosja mbi të është bazuar në një kallëzim anonim nga një person i paidentifikuar, për të cilin nuk ekziston as emër, adresë apo përfaqësues ligjor.

Veliaj rendit disa nga projektet kryesore të realizuara gjatë drejtimit të bashkisë, duke theksuar se për asnjërin prej tyre nuk është gjetur shkelje nga auditimet apo hetimet. Ai përmend inceneratorin, Teatrin Kombëtar, Pazarin e Ri, Piramidën, Astirin, shkollën “Sami Frashëri” dhe rrugët e rindërtimit, duke i cilësuar si “ndërhyrje historike” për transformimin e qytetit. “Çdo projekt është bërë me procedura, mbikëqyrje dhe auditim. Nuk ka asnjë vendim të paligjshëm, asnjë tender të manipuluar, asnjë kontratë fiktive,” deklaron ai.

Një nga akuzat më të forta në mesazhin e tij është ndalimi i kontakteve me avokatët ndërkombëtarë që po përgatisin mbrojtjen e tij për në Gjykatën Evropiane për të Drejtat e Njeriut. Sipas Veliajt, kjo tregon qartë se procesi po menaxhohet përmes presionit politik dhe jo mbi bazën e ligjit.

“Avokatët e mi nuk lejohen të më takojnë. Kërkesat e tyre nuk marrin përgjigje. Po flitet për drejtësi ndërkohë që ndalohet mbrojtja ime,” shkruan ai.

Në fund të reagimit, Veliaj rendit një sërë pyetjesh që, sipas tij, i drejtohen jo vetëm institucioneve të drejtësisë, por edhe opinionit publik:

• Pse hetimet nisen nga një letër anonime?

• Pse mediat informohen para të pandehurit?

• Pse akuzat formësohen pasi jepet një intervistë kritike ndaj sistemit?

• Pse ndalohet komunikimi me avokatët ndërkombëtarë?

Ai paralajmëron se do ta ndjekë çështjen në të gjitha instancat, përfshirë ato ndërkombëtare, duke kërkuar drejtësi dhe transparencë.

Veliaj mbyll mesazhin e tij me tone personale, duke e cilësuar këtë përndjekje si një çmim që po i kërkohet për punën që ka bërë në Tiranë. “Kam bërë 50 shkolla për fëmijët, por nuk mund ta çoj djalin tim në ditën e parë të shkollës. Ky është realiteti i drejtësisë që po ushtrohet mbi mua,” përfundon ai.

Deklarata e Veliajt ka ngritur menjëherë debat në opinionin publik dhe politik. Ndërsa mbështetësit e tij e konsiderojnë arrestimin të motivuar politikisht, opozita kërkon që drejtësia të vazhdojë pa ndërhyrje dhe të vendosë sipas ligjit.

“KORÇA BOOM”