53-vjeçari shqiptar rrëfen vr*sjen e gruas pak para divorcit

Një ngjarje e rëndë ka tronditur Rodopin në Greqi, ku një 53-vjeçar me origjinë shqiptare ka rrëfyer vrasjen e bashkëshortes së tij 44-vjeçare, gjithashtu me origjinë shqiptare.

Sipas ekzaminimit mjeko-ligjor, gruaja ka humbur jetën pas një goditjeje të vetme me thikë në qafë. Plaga ishte e thellë dhe kishte prekur edhe mushkërinë e djathtë, duke shkaktuar një hemorragji të rëndë të brendshme dhe të jashtme. Ekspertët vlerësojnë se vdekja ka ndodhur brenda 3 deri në 5 minutave.

Pas krimit, 53-vjeçari ka tentuar t’i japë fund jetës dhe është shtruar në spital. Pas daljes nga spitali, ai pritet të dërgohet para prokurorisë. Edhe fëmijët e çiftit kanë dhënë dëshmitë e tyre në lidhje me ngjarjen.

Gjatë dëshmisë së tij, autori i dyshuar pretendoi se ishte zemëruar dhe se e kishte sulmuar gruan pasi, sipas tij, ajo i kishte “acaruar nervat”.

Por pas kësaj tragjedie fshihet edhe një histori e dyshuar dhune në familje. 44-vjeçarja kishte vendosur të ndahej nga bashkëshorti dhe kishte caktuar një takim me avokaten e saj pikërisht ditën e sotme, për të vijuar procedurat e divorcit. Megjithatë, ajo u vra një ditë përpara takimit.

Avokatja e viktimës, Evgenia Kolias, ka deklaruar se episodi i dhunës i vitit 2022 nuk ishte i vetmi. Sipas saj, 44-vjeçarja ishte sulmuar disa herë nga bashkëshorti gjatë viteve.

“Viktima ishte sulmuar shumë herë nga bashkëshorti i saj. Nuk ishte vetëm ai në vitin 2022”, është shprehur avokatja.

Ajo ka folur gjithashtu për vështirësitë që përballojnë viktimat e dhunës në familje për t’u larguar nga marrëdhëniet abuzive, duke vënë në dukje veçanërisht varësinë dhe vështirësitë financiare.

Hetimet për ngjarjen vijojnë, ndërsa autoritetet pritet të marrin në shqyrtim edhe historikun e dhunës së pretenduar brenda familjes.

“KORÇA BOOM”