Nga shpresa te zhgënjimi, minutat shtesë i japin fund ëndrrës së Dinamos dhe Egnatias

Koha shtesë rezultoi fatale për dy skuadrat shqiptare në arenën europiane. Si Dinamo, ashtu edhe Egnatia e mbyllën kohën e rregullt në barazim, por në minutat shtesë pësuan golat vendimtarë që u kushtuan shtrenjtë.

Egnatia, kampione e Shqipërisë, u përball me Lilestromin në Norvegji në sfidën e play-off-it të Europa League. Rrogozhinasit arritën të barazonin 1-1 dhe gjithçka dukej se do të vendosej në minutat e fundit.

Por në minutën e 94-t të pjesës së parë të shtesave, Olsen gjeti rrugën e rrjetës dhe përmbysi rezultatin në 2-1, duke i dhënë fitoren skuadrës norvegjeze dhe duke i hequr Egnatias mundësinë për të vijuar në Europa League.

Megjithatë, aventura europiane e kampionëve të Shqipërisë nuk ka përfunduar. Egnatia do të vijojë garimin në kompeticionet europiane, pasi ka siguruar pjesëmarrjen në fazën e grupeve të Conference League.

Ndërkohë, për Dinamon, sfida ndaj Pafosit në Limasol ishte shumë më e dhimbshme. Koha e rregullt u mbyll në barazim 2-2, duke e çuar takimin në shtesë dhe duke lënë gjithçka të hapur.

Por pikërisht aty erdhi goditja fatale për skuadrën kryeqytetase. Në minutën e 116-të, Ngamaleu shënoi për Pafosin pas një goditjeje këndi, duke kaluar vendasit në avantazh.

Goli shkaktoi protesta të forta nga lojtarët e Dinamos, të cilët pretenduan për një prekje të topit me dorë nga David Luiz. Megjithatë, gjyqtari e konsideroi golin të rregullt dhe rezultati 3-2 mbeti në fuqi.

Vetëm katër minuta më vonë, në minutën e 120-të, Pafosi goditi sërish. Anderson realizoi golin e katërt për vendasit, duke vulosur fitoren 4-2 dhe eliminimin e Dinamos nga kompeticionet europiane.

Kështu, një natë që premtonte shumë për dy ekipet shqiptare u kthye në zhgënjim. Egnatia u eliminua nga Europa League, por do të vazhdojë në Conference League, ndërsa Dinamo i dha fund aventurës europiane pas një sfide të vendosur në minutat shtesë.

“KORÇA BOOM”