Alarm në Indi. Nipah, virusi që frikëson botën

Organizata Botërore e Shëndetësisë njoftoi identifikimin e dy rasteve të virusit Nipah në një provincë të Indisë lindore, duke bërë që disa vende aziatike të forcojnë masat në aeroporte.

Virusi Nipah ka një shkallë vdekshmërie 40-75% dhe i përket së njëjtës familje me viruset e fruthit. Ai është një zoonozë, që transmetohet nga kafshët te njerëzit, kryesisht përmes kontaktit me lakuriqët e natës ose derrat, ose nga frutat dhe lëngjet e kontaminuara. Transmetimi nga njeriu te njeriu ndodh vetëm me kontakt shumë të ngushtë. Periudha e inkubacionit zgjat 4-14 ditë.

Simptomat e para janë temperaturë, dhimbje koke, dhimbje muskujsh, të vjella dhe dhimbje fyti. Me përparimin e sëmundjes, rreth dy të tretat e pacientëve bien në koma brenda 5-7 ditësh, ndërsa disa shfaqin probleme në frymëmarrje dhe trurin.

Virusi Nipah klasifikohet në nivelin 4 të rrezikut biologjik, po aq sa Ebola. Nuk ekziston vaksinë apo trajtim specifik; Kujdesi është mbështetës, me fokus tek parandalimi dhe reduktimi i kontaktit me kafshët dhe njerëzit e infektuar.

Raste janë regjistruar kryesisht në Bangladesh, Indi, Malajzi, Filipine dhe Singapor, ndërsa rreziku i përhapjes jashtë këtyre zonave është shumë i ulët. Deri më 2024 janë regjistruar vetëm 754 raste në total.

"KORCA BOOM"