Gruaja dyshohet të ketë h*lmuar vjehrrën e saj

Një ngjarje e rëndë është zbuluar në Itali, ku një grua 48-vjeçare me origjinë shqiptare është vendosur nën masë sigurie, pasi dyshohet se i ka shkaktuar dëmtime të rënda shëndetësore vjehrrës së saj, një 73-vjeçare invalide.

Sipas hetimeve paraprake, gruaja, e cila kujdesej për të moshuarën në banesë, dyshohet se e ka ekspozuar atë në mënyrë të përsëritur ndaj substancave të rrezikshme, duke i përzier ato në ushqim. Sjellja e dyshuar ka ngritur alarmin pas disa episodeve të përsëritura të problemeve shëndetësore të viktimës, e cila është shtruar disa herë në spital.

Analizat mjekësore kanë zbuluar vlera anormale në gjak, të cilat sipas mjekëve lidhen me ekspozimin e vazhdueshëm ndaj substancave kimike toksike. Ky fakt ka çuar në nisjen e hetimeve nga autoritetet italiane.

Gjatë kontrollit të ushtruar në banesë, policia ka gjetur një produkt që përmbante Brodifacoum, një përbërës shumë i rrezikshëm, i cili dyshohet të jetë përdorur dhe të ketë ndikuar në përkeqësimin e gjendjes së të moshuarës.

Në vijim të hetimeve, gjykata ka vendosur masa sigurie ndaj 48-vjeçares, duke urdhëruar largimin e saj nga banesa familjare, ndalimin e afrimit ndaj viktimës, si dhe vendosjen e një pajisjeje elektronike monitorimi.

Autoritetet vijojnë hetimet për të zbardhur plotësisht rrethanat e kësaj ngjarjeje dhe për të verifikuar nëse persona të tjerë mund të jenë të përfshirë.

“KORÇA BOOM”