Mbi 16 mijë gra ndryshuan vendbanimin brenda një viti, çfarë po ndodh në Shqipëri

Lëvizjet e brendshme të popullsisë në Shqipëri po dominohen gjithnjë e më shumë nga gratë e reja, të cilat po ndryshojnë vendbanimin në kërkim të mundësive më të mira për arsimim, punësim dhe zhvillim profesional. Të dhënat e publikuara në raportin “Gra dhe Burra 2025” nga INSTAT tregojnë një diferencë të ndjeshme mes grave dhe burrave sa i përket migrimit të brendshëm gjatë vitit 2024.

Sipas raportit, gjatë vitit të kaluar kanë ndryshuar vendbanimin brenda territorit të Shqipërisë 16.289 gra, ndërsa numri i burrave që janë zhvendosur ka qenë vetëm 9.303. Këto shifra konfirmojnë se gratë vazhdojnë të jenë grupi më aktiv në lëvizjet e brendshme të popullsisë.

Më të prirura për t’u zhvendosur rezultojnë vajzat dhe gratë e reja. Në grupmoshën 20-24 vjeç janë regjistruar 3.080 gra që kanë ndryshuar vendbanimin, ndërsa në grupmoshën 25-29 vjeç numri arrin në 3.754. Në krahasim me to, burrat e së njëjtës moshë paraqesin shifra dukshëm më të ulëta, përkatësisht 537 dhe 1.098 persona.

Ekspertët e lidhin këtë tendencë me rritjen e pjesëmarrjes së grave në arsimin e lartë, si dhe me përpjekjet për të gjetur vende pune më të mira dhe më të qëndrueshme. Shumë të reja zgjedhin të zhvendosen drejt qyteteve të mëdha për të ndjekur studimet universitare ose për t’u integruar në tregun e punës.

Tirana vazhdon të mbetet destinacioni më i preferuar për migrimin e brendshëm. Kryeqyteti ofron më shumë mundësi në sektorë të ndryshëm si administrata publike, arsimi, shëndetësia, teknologjia, shërbimet dhe qendrat e kontaktit, duke tërhequr çdo vit mijëra të rinj nga qytete të tjera të vendit.

Megjithëse ritmi i lëvizjeve të brendshme ka shënuar një rënie krahasuar me vitin 2023, diferenca gjinore mbetet e theksuar. Një vit më parë kishin ndryshuar vendbanimin 19.805 gra dhe 12.277 burra, çka tregon se gratë vijojnë të jenë forca kryesore e migrimit të brendshëm në Shqipëri.

Të dhënat e INSTAT nxjerrin në pah jo vetëm ndryshimet demografike që po ndodhin në vend, por edhe rolin gjithnjë e më aktiv të grave në arsim, ekonomi dhe tregun e punës, duke reflektuar transformimet sociale të shoqërisë shqiptare.

“KORÇA BOOM”