Vendimi që prek fermerët/ Rama jep arsyet e heqjes së skemës së naftës

Kryeministri Edi Rama ka folur gjatë një takimi me sipërmarrës të përpunimit të vajit të ullirit në Berat, ku ka trajtuar edhe çështjen e mbështetjes për bujqësinë, përfshirë ndryshimet në skemën e subvencionimit të naftës.

Rama u ndal tek problematikat dhe abuzimet që, sipas tij, kanë shoqëruar përdorimin e këtij subvencioni ndër vite, duke theksuar se qeveria është detyruar të eksperimentojë disa forma mbështetjeje për të arritur një rezultat më efikas dhe më të drejtë për fermerët realë.

Ai u shpreh se qëllimi i politikave të reja është ulja e kostove dhe rritja e konkurrueshmërisë së prodhuesve vendas, duke nxitur organizimin e tyre në struktura më të mëdha dhe më efikase, që mund të sjellin më shumë vlerë në tregun vendas dhe atë të eksportit.

Kryeministri foli gjithashtu për programet e reja mbështetëse për sektorin, përfshirë nismën “Dyfisho Ndërmarrjen Tënde”, që synon financimin e bizneseve me plane të qarta zhvillimi dhe projekte të qëndrueshme.

Sa i përket subvencionit të naftës për bujqësinë, Rama deklaroi se skema aktuale ka sjellë probleme të shumta në zbatim, duke përmendur raste abuzimi dhe përdorim joefektiv të mbështetjes shtetërore. Sipas tij, në disa raste përfitimet nuk kanë shkuar tek ata që realisht punojnë tokën.

Ai shtoi se ndryshimet e ndërmarra synojnë të shmangin keqpërdorimin dhe të orientojnë ndihmën drejt prodhuesve që kanë aktivitet real bujqësor, duke theksuar se vendimmarrja vjen edhe si rezultat i rritjes së formalizimit në sektor.

“KORÇA BOOM”